මග හැරුනු නුබේ නෙත
මගේ නෙත් මානයෙන්......
තවමත් පීරා සොයමි මම
නුබේ නෙතු කොතැනක කියා.....

මතක බිදු හද කොනක
සිරකරන් සිහිනයක් සේ......
හිත් හදාගමු ඉතින් ප්‍රේමයත්
අමරනීයවූ පරිත්‍යාගයක් සේ.....

මුනගැසුනු මුත් කෙදින
නෙතු පියන් එකිනෙකට ගැටිලා....
ඉමු දුරින් නාදුනන ලෙස අපිත්
සිතින් පමනක් ලංවෙලා.....

නදී ..✍️

සිතක් හඩනවානම් හොර රහසේම හංගා කදුලු කැට...
හිරකරලන්න නොහැකි මුත් පෑරුනු
සිත් වේදනා සැම.....
පැතුමක් පැතුවානම් ආසිරි ජය පතලා කහටක් නොමැතිවම....
සිතක් තුටු වේවි යන මාවත දැක හද පත්ලෙන්ම.....

නදී ..✍️

??

සංගීත පංතියේ කෙලවරේ
තත් සුසරකල මගේ වයලීනයෙන්
උච්ච ස්වරයෙන් වැයූ ගීයක
තනුව අද නෑ මතකෙට මගේ..??

තනිකම රජයන මන්දගාමී සැදෑවේ
සුසර බව ගිලිහිච්ච මගේ වයලීනයෙන්ම
වයමි අද මා මන්ද ස්වරයෙන්
පැරණි ගීයම නවමු තනුවට මෙසේ.......??

නදී..✍️

හද ගිනි ඇවිලී
මසිත දවාලූ
කදුලැලි දෙනෙතට
උරුම වෙලා....

හද විල කැලබූ
සුපුරුදු හැගුමක
පැතුමක් පමනක්
ඉතිරි වෙලා.....

හද මගෙ සුපිපුනු
පෙම්බර හැගුමට
උපන් ලෙසම
මියදෙන්න වෙලා.....

නදී..✍️

තාත්තේ මගේ...✍

තැවෙමි මා හද විලම
දුක් සුසුම් නෙක මුසුව
දෙපා මුල වැටී නුබෙ
ඉකිගසා හඩමි මා
අයදිමින් සමා.........

නුපුරුදු නුබේ බැනුම්
සුපුරුදු අම්මගෙ බැනුම්
අහස පොළවසේ මට
දැනේ වෙනසක්
ගලපගනු බැරි ලෙසම....

කමාකරනු මැන
නොකරමි යලිත්
කිසිවිටෙක සිත් රිදුම්....

ඇහුවත් නුබෙන් බැනුම්
තරහ නෑ මං,
නුබේ දෝනි ඉතිං.....

නදී..✍️

ආදර මගෙ පුංචි වෙත..✍

සසරෙ සුපුරුදු සෙනෙහෙ සුළගකි
හමන්නේ මා සිත වෙලා ගෙන
නුබෙම දියණිය වාගෙ මා වෙත
හෙලන්නේ කෙලෙසකද නුබේ ඔය නෙත

පුංචි සංදියෙ මා වඩා ගෙන
නැලවුවා මතකයි අද වාගෙම
පාට පාටින් ඇදුම් ගෙනවිත්
හැඩකලා මතකයි අද වාගෙම

පාතැබුව මා යොවුන් විය වෙත
තුටු සිතින් මා සමීපෙට ගෙන
නොවන්නට අතරමං දිවි මාවතේ
නිවැරදි මගක් පෙන්නුවා නුඹ

මවට පමනකි දෙවෙනි නුඹ මට
ලගම හිතවතියයි මසිත සනසන
කොනකවත් නැත සිතේ කහටක්
දිරිය දුනි මගෙ දිනුම ලැබුමට

නුබෙන් මා වෙත පිදුනු සෙනෙහෙට ණය ගැතියි මා නුඹට සැමදින
පතමි ආසිරි නුඹට අද මම වේවා නිදුකින් වැජබෙන සුබම සුබ උපන් දිනක් ......

නදී..✍️

කිරිල්ලියකගේ කදුලු කතාවක්..

වෙල්‍ යායේ එගොඩ ගොඩේ
සපු ගස මුදුනේ
කෝටු කෑලි පරඩැල් යහමින් ගොතමින්නේ
පැතුමන් ගොන්නක් පොදිබැද සෙනෙහෙ කැදැල්ලේ
රැක්කා නිල් මැනිකක් සේ
පුංචි බිත්තරේ

ලැබුනු මගේ උනුහුම යට
වහන් වෙලා
දුටුවා මම මගේ පැටිය
මෙලොව බිහිවෙලා
උතුරා යන මහගු සෙනේ
දෝරෙ ගලාලා
පියතුමා සමගින් මගේ
තුටුකැන් ලියලලා

මගේ පුතුනි නුඹ ඉපදුණු
ඒ උදෑසනේ
මමත් පියත් ගියා එදා
කෑම සොයමිනේ
රැක සිටි මහ නපුරු පූස
දුටුව අප අනේ
පැන්න ගමන් අල්ලගත්ත
පියා පුතෙ නුබේ

නෙතට ආපු කදුලු බිංදු
හිතෙහි හිරකරන්
රැක්කා මහමෙරක් උසට
නුඹව පණ ලෙසින්
මසක් පුරා කවා පොවා
උස් මහත් කරන්
පියඹවන්න සිතුවා නුඹ
හෙට උදෑසනින්

ආව අදත් කෑම සොයා
හැමදාම වගේ
දුටුවා පොඩි පණු පැටියෙක්
තාර පාරෙදී
නුබ කැමතිම ආහාරය
එයම පමනකී
මතක් වෙලා මට එතකොට
සිනහ ඉනුවනේ

ඒත් පුතුනි එන්නට බැහැ
මට සමා වෙයන්
හිතක් නොමැති වාහනයක්
මාව යට කරන්
මතක් වුනේ නුඹ පමනකි
මාගෙ රත්තරන්
අදින් පසුව බාරකරමි දෙවියන්හට මගේ රන් පුතුන්

නදී ..✍️

නොසිතූ දිනයක
නොසිතූ මොහොතක
නෙතු කදුලින් තෙමා
ඇය නික්මුනා ආයෙත්
නොඑන්නම .....

විදු මවම හඩවලා
ශේත වර්ණෙන් සරසලා .....
අදින් වසරකට
එහා.....පොත් ටිකත් පසෙකලා .....
ඇය නික්මුනා
ආයෙත් නොඑන්නම ......

ගුරු මවකි හොදම
යෙහෙළියකි ඇය
සිත් සතන් සනසවාපූ.....
දැනුම් කෙතකි මහා
සිප්කිරෙන් අප තෙමාපූ ....

ඇය තැබූ හිස්තැනට
වසරක්ම ගතවෙලා...
හීනෙකින් වත් ඇයට
හැකිනම් යලිත්
නොයන්නම එන්න.....
-------------

දයාබර කුසුම් ගුරු මව්ගෙ
ගුණ කන්ද
ශිලා ලිපියක් ලෙසින්
හද පත්ලේ
තැන්පත් වෙලා.....
පද පෙලක් මේ ලෙසින් කැටි වෙලා ලිය වුනා....


????????
(2021.01.29ට යෙදුනු කුසුමලතා ගුරු මවගේ වර්ෂ පූර්ණය නිමිත්තෙන් )
????????
නදී ..✍️

---------

කොළ පැහැයක් නොපෙනෙන මානයේ....
මහ කතරක විලාසය පෙනෙයි ඇස් ඉස්මත්තේ....

කර්කශ පොලෝ තලය මැද මිනිසා අයදියි මෙදානම්.....
දෙන්න මහ වරුසාව?️
නිවාලන්නට ඉඩෝරය.....
------------

පලාවර්ණ තුරු ගොමු
හැම මුලිනුපුටා...
දිය උල්පතක් පාසා සැම
සුන් කරලා....
තමන් නමට ලියවී ඇති
දේ ලෙසටා...
කටයුතු කරයි ඇතමෙක් අද ඊයේ
උපන් ලෙසා....


කුරිරු මිනිස් ගතියට
දඩුවම් දීලා....
අව් රශ්මියෙන් දවනව
ගත සැප නොතකා....
සොබාදම නොඉවසයි තවත් මෙදා ....
පාඩම් කියා දෙයි
හොද නොහොද කාටත්
අග මුල සිහිකරලා....

නදී..✍️

අම්මා .....

"අ"යන්නෙන් පටන් ගත්
හෝඩි පොතේ මුල් අකුර....
ආදර අම්මා ලෙස ලියන්න
ඉගැන්නූ මුල් ගුරුතුමිය....

තාත්තා සමගින් අපට
ආදර දයාබර නෙතින්
නිමක් නැති සෙනෙහසක්
පැතිර වූ සෙනෙහෙවන්තිය......

තෙරක් නැති කතා කෝච්චි
නිමක් නැති පුංචි රහස් සවන් යොමා හිත ඇතුලෙම රදවගත්
සොදුරු හිතවතිය......

ජීවිත මාවතේ ඉදිරියටම යන්න
නිර්ලෝබීව සවි දුන්න
ඇගේ දුක හංගාගෙන අපේ සතුට ගැනම සිතූ පරිත්‍යාගවන්තිය...

ආදර අම්මා.........❤️

නදී ..✍️

කිරි දියරක් සේ නොගැලූ සෙනේ
දිය දහඩිය කදුලැලි වී
ගැලුවා .....
පැතුවත් ඔබහට නොහැකිවු
සිහිනෙට මා යන මාවත
එලිය කලා .....
වැටුනත් නැගිටා පෙරටම
යන්නට ඒ හැම විටකම
දිරි දුන්නා ......
තාත්තේ නුඹ මේ පිං
මහිමෙන් නිදුක් බවින් නිති
වැජඹේවා ....

නදී..✍️

හොද දොස්තර නෝන කෙනෙක් ?‍⚕️

ෆොමලින් වාෂ්පෙට
කැරපොත්තො ගෙම්බො
බිලි වුනෙ පවට පින දී ගන්න වෙන්න හොද
දොස්තරනෝන කෙනෙක්..

ගබඩාව හිස් කරන්
ආවර්තිතා වගුවෙන් බාගයක් දියවුනේ පිච්චුනෙ
වෙද කම හොද හැටි
දන්න වෙන්න හොද
දොස්තර නෝන කෙනෙක් ..

නිව්ටන්ගෙ නියමයන්
ආකිමිඩ්ස්ගෙ නියමයන්
යාන්ට්‍ර විද්‍යා නියමයන්
හැම එකක්ම ඉගැන්නුවෙ
තාර්කිකව හිතන්න පුලුවන්
වෙන්න හොද
දොස්තර නෝන කෙනෙක් ..

හොදහැටි හදාරා ජිව විද්‍යා රසායන විද්‍යා වගෙම භෞතික විද්‍යාවද
මටත් ආසයි දවසක වෙන්න
හොද හදවතක් ඇති
දොස්තර නෝන කෙනෙක් ..

නදී ..✍️