Ranatunge Jayawardene 5 hours ago 5 0 0
එපා මා හැරයන්න එපා මා රිදවන්න ඔබේ සෙවනට එන්න, අනේ මට ඉඩ දෙන්න ! * සැඳෑ ඉර හංගලා පුරා සඳ මෝරලා යහන මත සැතපිලා, මට එන්න ඉඟි කලා * උණු දියේ කිමිදෙමින් වකුටු වී ගුලි වෙලා ඔබේ මේ කුටිය තුල, ජීවිතේ පැල වෙලා * අම්මෙ මා දස-මසක් ලෝකයෙන් සඟවන්න එපා තව ඉඩ දෙන්න, ඔය හිතට රැවටෙන්න! ------------------------------------- රනේ/27ජුලි2024/ සඟවන්න මා
Ranatunge Jayawardene 2 days ago 11 0 0
ගී හිස මා ලය පසාරු කලෙ දෝ නුඹ මා උර මත ඉකි බිඳ උන් සඳ ළමැද ගලා ආ ආදර ස්වරයට සුසුම් හෙලන සේ රළ පෙල බිඳුනේ * පෙම් රැලි වෙරළේ වැලි යට කිඳිලා පෙන පිඬු මා හද පතුලේ රැඳිලා ගල් පර හිරුතුල නැහැවී යද්දෙන් විහඟුන් මාගේ තනියට ඉද්දෙන් * මඳ සුළගේ මේ පනිවුඩ ගෙන ගොස් ඇගෙ කුටියේ දොර අභියස තබපන් බමරුනි නුඹ රොන් ගන්නා අටියෙන් මේ දුක පෙති මත ලියලා තියපන් * දිනයක ඇය මල් පෙති මත සිඹිමින් හදවත මත ඒ තාලය ඇඳගන් එතකන් සුළගේ මා වට රැඳෙමින් ඒ ගී මා වෙත හී ලෙස විදපන් ! ---------------------------------------------- රනේ/25ජුලි2024/සන්තාපය
Ranatunge Jayawardene 4 days ago 12 0 0
අකුරු සමග පොර-බදද්දි නෙත් වලිනුයි කථා කලේ දෙහ-දක් එක් අරමුනකට පොරොන්දු වූ හැටි පුදුමයි * මහප්-ප්රාණ නෑ හිතුවේ ඒ මොහොතයි අගය කලේ හිටියෙත් අපි ඇස් ඇරගෙන පාට කන්ණාඩි නොමැතිව * ශිල්පය ජය මාවත වී දූ දරුවන් වත්කම වී මුළු පවුලම සම්පත වී මිහිපිට දෙව්ලොව හමුවී * එකට වැටී, එකට කකා එකටම උන්නත් මෙතුවක් නිකං සිල්ලරේ කිව්වට ආදර තොගය ම ඉතුරුයි! ------------------------------------------------- රනේ/21ජුලි2024/ආදර-තොග
Ranatunge Jayawardene 6 days ago 13 0 0
කෝං පිට්ටු ඉදෙන තුරා වැලි-කිරිබත් බෙදා ගත්තු බට්ටො පැනපු, ඔට්ටු දාපු එක පවුලේ පුංචි චන්ඩි * කරදන්ඩෙන් උස්ව යද්දි ළාමක ගති නැති වෙන්නේ සිල්ප ටිකක් පුරුදු වෙලා ඉක්මනටම 'ලොක්කො' වෙනා * මල ම නොවේ කටු හමුවේ ජීවිත තරඟය පරදියි මහ-ගෙදරින් උරුම සොයන් කැණීමඬල'ට නෑ ඉහිලුම් ! * අගින් ලියලමින් වැඩුන ට මුල් මියගිය පවුල් ගස් ය. "කොයි තරමට උඩක ගියත් තරු රැසකින් නැහැනෙ පලක් !" -------------------------------------------------- රනේ/14ජුලි2024/තරු-රැස
Ranatunge Jayawardene 1 week ago 19 0 0
හද ගොළු වුනා, වියලුනා වදන් වැල් අවසාන දවස අද .. පටන්ගැන්මට පෙර විරහවේ නපුරු කම. * ඉදින්, මා මෙතෙක් විඳි ඔබෙන් ලද ඒ සුන්දර මිහිරියාව පැවරුවා නුබ ගැබට සරසවන්නට දේදුන්න නැහැවෙන පරිදි මා ඒ තුල, හෙට සිට. * රැඳෙව්වා ඔබෙ සුසුම් වලාකුළු අතර මම දාහයට ගෙන දෙන මෙන් සිහිල් කල පවන් රැල් ලෙස යලි යලි.. * පැවරුවා නා දලු වලට මම පැහැය නුඹ තොල් පෙති වල ගෙන එන මෙන් මා වෙත ඒ මිහිර හුදකලාවෙම නැවතත්.. * මුසුකලා මම ඔබ හද ගැස්ම, මුනුමුනුව තුල නදියේ දනවන ලෙස යලි යලි මටම. * මුහු කලා මා මන මත් කල ඔබෙ සුවඳ .. රෑ පිපෙන සේපාලිකා මල් වල නිදහසේ මට විඳගනු රිසියෙන් යලි. * එක් කලා කන් කලු හඬ නුඹේ කෝකිල නාදයට මගේ සවනත වැටෙන ලෙස නිරතුරු. * නෙතු අඟින් කථාකල ඔබ දෑස් කැල්මන් එබ්බුවා මම මිනි කැට තුල පරිස්සම් වන ලෙස නොවෙනස්ව.. * විරහව, අවසරයි, එන්න මා වෙත දැන් තනි නැහැ මම. ----------------------------------------- රනේ/16ජුලි2024/විරහව
Ranatunge Jayawardene 2 weeks ago 23 0 0
දෙවිපිහිට පතන්නෙමි සදාදර අප්පච්චි, * කාලෙකින් බැරිවුනා තොරතුරක් දැනගන්න අම්මාට හොඳයි නේ ඔයත් ඇති සනීපෙන්. * උස් තැනට ගෙනාවට මාව බරකට නොගෙන රටේ බර කරට ගත් කොහිද මට නිදහසක් * අර කොනේ මේ කොනේ රාජ කා-රිය මටයි ඇමතිලා, නෝනලා මා වටා රොක් වෙලා * ලොකු පුතා රට ගියා නෝන පොඩි' දුව එක්ක මං ඉන්නෙ ජය'පුරේ නැහැ නිතර හමුවෙන්නෙ. * නෝනලැ'යි මව් පියන් ඇවිත් මෙහෙ ඉන්නවා ඒ හින්ද මං නැහැයි උන්ට නැහැ පාඩුවක් * තව උසස් වීමකුත් ලැබේවිලු ළඟදීම මම ඉන්න තත්වෙ ගැන ඔයාටත් සතුටු ඇති! * ලබන අවු'-රුද්දෙ මැද විත් යන්න හැකිවේවි මේ එවන පන්-දාහෙ බෙහෙත් ටික අරගන්න! * ආයිමත් ලියන්නම් හැම දෙනා සිහිකරමි මේ ඔබේ සදාදර, දිසාපති සුදු පුතා! ------------------------------ රනේ/11ජුලි2024/ සුදු පුතා
Ranatunge Jayawardene 2 weeks ago 33 0 1
එන්ජිම සැර දා මට හූ කියලා පොළව හොල්ලලා තරහින් දිව්වා * ටකරං වහලේ මළකඩ සිදුරෙන් දුහුවිලි ඊතල මූනට විදුනා * බොර පැහැ ඇස්ගෙඩි පියනෙන් වැහුවට කබ දිය කරගෙන උල්පත් හැදුනා * දැලකට මැදිවූ මැස්සෙක් වූ හිත දිගටම නුඹ ගැන කලබල කෙරුවා * තහඩු බිත්තියේ ඇනයක එල්ලී තත්පර වෙඩි මුර ඔලුවට එව්වා * ඊළඟ හූවෙන් ඕ නෙගටිව් බව යකඩ පීල්ලේ පාටින් පෙනුනා. ------------------------------ රනේ/09ජුලි2024/ ඕ නෙගටිව්
Ranatunge Jayawardene 2 weeks ago 29 0 0
අපි පැරදුනා .. රට පැරදුනා.. අපි කොන් වුනා, ඔබ දුක් වුනා. * කවුරුවත් කැමති නෑ යාළුවොත් එන්නෙ නෑ කාටවත් ඕන නෑ මොකද අපි දිනල නෑ * උත්සව'ත් ඇත්තෙ නෑ නලා,හැඬ වෙන්නෙ නෑ පෙරහරක් යන්නෙ නෑ නායකයො ඇත්තෙ නෑ * සමාජෙත් ගැරහුවා පාසලෙන් කොන් වුනා අපේ සිත පෑරුනා ඔබ අපෙන් වෙන් වුනා ! * ඇති වෙලා, නැති වුනා හැකි වෙලා, බැරි වුනා තුටු වෙලා, දුක් වුනා එක් වෙලා, වෙන් වුනා *** ජීවිතේ පුරා අපෙ, දිනපු හැටි දන්නෙ අපි ! පරදින්න දන්නෙ නැති, ජීවිතෙයි දිනුවෙ අපි! -------------------------------------------- රනේ/06ජුලි2024/අපේ ජය!
Ranatunge Jayawardene 3 weeks ago 33 0 0
හෙව්වා ඒකට ගැලපෙන වෙලාව හොඳම දවස සහ ලග්න යෝගයත්, ග්රහ හැසිරීමත්, අපල ආදියත්. * හොඳම දසාවත් අතුරු දසාවත් හරියන නැකතත් සුභම දිශාවත්. * ජාති, ආගමත් හොඳම ප්රදේශත් හරියන කුලයත් නාම ගෝත්රෙත්. * ගැලපෙන වයසත් හරියන උසකුත් සරිලන මහතත් කැමතිම පාටත්. * උගත් සාස්ත්රෙත් ජීවන තත්වෙත් පවුලේ තත්වෙත් කීර්ති නාමෙත්. * ධනස්කන්දයත් දේශපාලනෙත් අම්මගෙ තත්වෙත් අප්පගෙ පැත්තත් ඇති බව-බෝගත් නැති අසනීපත්. * මේක හරිම හරි මඟුල් සක්වලක් ! හෙව්වෙ නැත්තෙ තව ගිය ආත්මයත්, ඊළඟ භවයත්! -------------------------------- රනේ/05ජුලි2024/ මඟුල් සක්වල
Ranatunge Jayawardene 3 weeks ago 26 0 0
මා මියදුනා නොවේ අළුතෙන් ඉපදුනා.. ! ඔබ, මා පැරදුවා නොවේ මම පැරදුනා.. ! ඔබ මා පසුකලා නොවේ මම පහු වුනා ..! ඔබ මා හැරගියා නොවේ මං නැවතුනා..! ඒ ඔබ, නිසා නොවේ මා, ඔබ නිසා ..! ------------------------------------------------ රනේ/04ජුලි2024/මා, ඔබමයි
චතූ 3 weeks ago 8 0 1
ඉඳුරු දිග රිසි සඳ සිනාවට කවි පේළි ඇවිලිලා යයි නම් වලාකුළු එකිනෙක ලිහෙද්දී නුඹේ ඇස් තුළ මම ගිලෙන්නම් තුඟු පුළුල් උර සිනා කෙහෙරැළි දඟ දෑස්වල හැඩ හඟින්නම් පුරා දින සති ගෙවා සිහිනෙන් නුඹෙ පුළුල් උර මත නිවෙන්නම්
Ranatunge Jayawardene 3 weeks ago 35 0 0
එළි මහනේ, ගිනි අව්වේ හිඳගෙන අන්ඩ දමා ඇති කලිසම් කඩ හැඳි කම්කරුවෙකි, මම ඔබ සිතනා ඒ නිවාඩු ගන්නැති. * මුතු කැට යැයි ඔබ කවියෙන් පවසන සියොළඟ ගලනා; අව්වේ දිලිසෙන ලුණු රස ඩා බිංදු උල්පත් අඩු නැති. * "හිසටත් ඉහලින් කුළු ගෙඩි ඔසවන ව්යායා'යාමයක්" නොවෙදෝ ඒනම් ඔබ සිතනා විට කළු ගල් වලට ද ඉවසනු බැරුවැති. * මගෙ දරුවන් ගැන සිහි කරමින් මම මහ මඟ හිටගෙන දහවල බත්පත බුදිනා බව දුටු ඔබට සිතුති නම් "විවේක සුවයෙන්" හිඳිනා බව මම හිසට එල්ල වූ කුළු පහරක් එය. * රාත්රියට මට ජීවත් වන්නට ඇඟේ රුදාවට බෙහෙතක් නැති මුත් රහමෙර, ඹෞෂද නොවෙදැයි සැලකුව මා, දුටුකල ඔබ "කාලකන්නි" ලෙද පිළිකුල් කොට ඇති. * හෙට ඉර පායා මහමග එන විට වැඩි සුව පහසුව ඔබට දැනෙනු ඇති රෑ මැද වන තෙක් අප වෙහෙසුන බව ඒ සිතුවිලි තුල හමුවනු නැතුවැති. * "අයිතිවාසිකම් දිනා" නැවත ඔබ ආපිට එන විට ඉල්ලීමක් නැති හිමි වීමක් නැති කුළු ගෙඩි අත ඇති උදලු දරා ඇති කලු ගල් සිත් ඇති වැදගම්මක් නැති අප හමුවනු ඇති.. ! ----------------------------------------- රනේ/02ජුලි2024/වගකීම්
Copyright © 2021 Nisadas | Powered by Arvin Apps